....

وبقيت زى أميرة قلبها شحات

الجخ

احتياج

جدا محتاجة جددداااا أتكلم مع حد غريب..معرفوش

متعرفتش عليه قبل كدة..متكلمناش خالص

معندوش سوابق عندى..نضيف

صفحته بيضا فى قلبى

حد مجرحنيش بكلمة..ولا بموقف

حد معرفش عيوبه

يبقى بالنسبالى زى الطفل 

بفطرته كدة

اقوله كل اللى مخبياه وواجعنى

اقوله على اسرارى

اشكيله

بس بشرط

ميردش

!

شفاء

يبدو أنى أصبت بمتلازمة ستوكهولم!

برغم محاولاته فى ألمى ووجع قلبى-حرفيا- أياما بسببه

إلا إنى أستمر فى الدعاء له

وأرسل دعواتى بدموعى لرب السماء عله يستجب

لكن لا مفر من اثتين

لا يتغير الحال معه

ولا أنا معى !

لكنى قررت ألا أستسلم لوخز الضمير لأنى ضايقته

سأمارس هذا السلوك معه وفقط

سأتذكر كم تركت وحدى أبكى بسببه ولا أحد يعرف

سأتذكر كم جاهدت نفسى لأحافظ على ما تبقى من دينى معه

سأتذكر كم دافعت عن خامتى !

يضحكنى حد البكاء ان الجميع يظنون أننا نعيش قصة روميو وجولييته !

هـــــــــــــــــــراء!

مبتلاه أنا به فى دينى..فى عفافى وطهرى!

كم لله من حكم!

عـِفـرِيتى

فاكرين الفيلم بتاع شادية وصلاح ذو الفقار اللى اسمه عفريت مراتى؟ اللى كانت طالعة فيه شادية كل ما تتفرج على فيلم تتقمص دور البطلة؟

أنا اكتشفت إنى بعمل كدة !

بس مش بتقمص دور البطلة فى الافلام .. لأ..بتقمص دور الأبطال فى الروايات اللى بقراها !

متستغربوش ..بس فعلا دة اللى بيحصل !

من يومين وأنا عاكفة على قراءة رواية اسمها( أحببتك أكثر مما ينبغى) لكاتبة سعودية اسمها أثير عبد الله ، تحكى الرواية عن سعودية مبتعثة إلى كندا لإكمال دراستها، وهناك تعرفت على شاب عربى تجرعت مرار الألم على يديه خمس سنوات طوال وفى النهاية تركتلى الكاتبة النهاية مفتوحة !

لا أعجب كثيرا بروايات الحب خارج نطاق الزواج..حتى أننى أستحرمها على نفسى!

لكنى وجدت نفسى مستمرة فى قراءتها بسبب أننى أشبهها كثيرا كثيرا، حتى فى أدق التفاصيل ، تفاصيل مجتمعة ، قد لا تتشابهه وتجتمع كلها فى إثنين على الأرض !
حتى نفس الظروف ، نفس الألم ، نفس الأسباب والنتائج !

وجدت نفسى أبكيها وأبكى لنفسى معها ، وكرهته ، وغضبت منه !

وجدت نفسى أحاكيها فى تصرفاتى وكلامى ، وأحاكيه أيضا !

برقتها وبقسوته !

تملكتنى جمانة ! وتملكنى عزيز!

أحب كثيرا الروايات ، تجعلنى أنفصل عن عالمى ، الذى أكرهه أحيانا ، وأتعجب منه ، وأتشبث به أخرى !

لكن أفضل ما يفيدنى فى الروايات ، معايشة خبرات الآخرين والإستفادة منها ، حتى لو كانت نسج خيال !

لا يهم !

أنا مستمتعة بتقمصى هذا ، وسأمارسه على من حولى ! تجديد !

خدوا بالكو ، لعلى أتقمص شخصية من شخصيات أجاثا كريستى المرة القادمة :)

أَلَا إِنَّ نَصْرَ اللَّـهِ قَرِيبٌ

سبحان الله..لله فى الحياة شئون

ولو تدبرنا الأمر لوجدنا

ان مبارك كان من حقة يحكمنا 12 عام فقط

لكنه استمر لمدة 18 عام أخرى ..هكذا !

وفى 18 يوم فقط استطاع الشعب إسقاط النظام !

وكأن الله يعوضنا عن كل عام ظلم وجور بيوم من النصر والثبات !

وكأننا كان لابد لنا أن نثور عليه ونقول له كفى ظلما بعد إكماله ل 12 عام

وعندما سكتنا..ابتلانا الله ب 18 عام من الظلم

ولكن عندما انتفضنا..أبدلنا الله بهم عزة ونصر منه !

بكل عام سكوت..بكل يوم نصر!

الجمعة:11\2\2011

الساعة السادسة مساءً

وفى 30 ثانية ألقى على الشعب المصرى خطاب التنحى

وتم لهم ما ارادوا

هنيئا لى بمصريتى..وهنيئا لمصر بشعبها
والحمد لله رب العالمين

....

 .

ممكن تكون عاوز تفضفض مع حد

فتروح لصحابك تفضفض معاهم

ممكن ينسّوك شوية..بس حترجع تانى على سريرك وانت متضايق

كانت فضفضة وقتية

.

ممكن تكون عندك مشكلة ومش لاقيلها حل

تروح للى واثق فى رأيه وتستشيره

ممكن يقولك الحل..وممكن يحتار معاك ويحيّرك اكتر

وحتى لو قالك حل..ممكن يطلع صح وفى مصلحتك وممكن يطلع غلط ويضرك

.

ممكن تكون مش متضايق أصلا ومعندكش مشكلة أساسا

بس قاعد وحيد ومحتاج حد يونسك

ممكن تلاقى الحد دة..وممكن يكون مشغول

وتفضل لوحدك برضة

.

.

لما تكون متضايق..أو عندك مشكلة..أو وحيد

ليه مش بتروحله؟

مش مصدق انه ممكن يكلمك؟

وتفضفضله ويرد عليك؟

مش مصدق انه مقدرلك الخير وحيرضيك؟

مش مصدق انه بيونسك وانت وحيد او حتى وانت مع أصحابك؟

...

حتفضفضله

ومش حيقولك معلش مش فاضى ورايا شغل بكره الصبح بدرى

...

حتشكيله 

وحيحل مشكلتك باللى فيه النفع ليك وحيرضيك

...

حتتونس بيه

وحيفضل معاك حتى فى منامك

.

.
فى اللحظة دى مش حتلاقى غير ربنا وساعتها ربنا حيكلمك
.
.

عارف تعرف ازاى ان ربنا بيكلمك؟

سبحانه ربنا مش حيكلمك زى ما كلم موسى عليه السلام

لكن ربنا حيكلمك فى قلبك..جواك

حتحس بربنا رايد يقولك ايه وحتفهمه

حتحس ان فيه حد تانى بيكلمك غير نفسك وعقلك وقلبك وروحك وضميرك

صوت بيطمنك..بينورك..بيفهّمك..بيهدى حيرتك

صوت بيقولك هو دة..امشى هنا..اثبت هنا..خلى بالك من هنا

انت لوحدك حتعرف..صدقنى حتعرف

حتحسها
.

....

{

وَحَرْسِمْ بَسْمِتِى عَلَى وِشِّى وَلَوْ بِالْمُوسْ..!

أنـا  

}

زى ما عشت...زى ما عشتش

مممممممممم

 حالة وماسكانى بقالها فترة مش صغيرة

وبجد مش عارفة اطلعها من دماغى !

هو انا لما أموت ممكن حد يفتكرنى كل يوم ويدعيلى؟

كنت بشوف أصحاب مدونات توفوا وادخل على مدوناتهم

الاقى تعليقات تجاوزت العشرات

بيدعو ليهم..بجد كنت بغبطهم

ياترى ممكن الاقى العدد دة

حلاقى ناس بتحبنى كدة

من غير ما تشوفنى

عشان مدونتى مثلا عجبته فدعالى

او الاقى حد عملى صفحة على الفيس بوك

وبيبعت للناس عشان تدعيلى

والله انا اشك ان فى حد حيفتكرنى اصلا ههههه

بس  حاجة حلوة صح؟

 يا ترى حلاقى ؟

ولاّ زى ماكتبت زى ماكتبتش

زى ماعشت زى ما عشتش

!..!

.

أن تكون خاطباً او مخطوبةً

• أن تكونى مخطوبةً تبقى مش عارف تشكر ربنا ازاى..فتشكره بالبكاء
• أن تكونى مخطوبةً يبقى لازم تعمل حاجتك لآخر وقت..وتزنق نفسك..أمال عروسة ازاى لو مش اتاخرت!
• أن تكونى مخطوبةً انك بعد 12 ساعة تعب فى تحضير نفسك والمكان تصحى بعد نوم 5 ساعات عشان تكتب البوست دة!
• أن تكون خاطباً يبقى تكون أحلى من العروسة خاصة لو كنت لابس بدلة زيتى
• أن تكون خاطباً يبقى لازم تنسى الدبلة
• أن تكونى مخطوبةً وتكون الخطوبة يوم حداشر سبتمبر وأمريكا تحتفل معاكى
• أن تكونى مخطوبة انك حتشوفى معنى الحديث من ارضى الله بسخط الناس رضى الله عنه وارضى عنه الناس
• أنك تكونى مخطوبةً حتتأكدى من صدق مشاعرك وحسن اختيارك
• أنك تكون خاطباً يبقى انت راجل ويا سلام لو اول حرف من اسمك ط
• أن تكونى مخطوبةً ويبقى اختيارك هو نفس اختيار الله لكِ
• أن تكونى مخطوبةً وأول حرف من اسمك ش يبقى لازم ماتنسيش طبيعتك فى المعيلة حتى وانتى فى الكوشة!
• أن تكونى مخطوبة وخطوبتك تتعمل على يومين يبقى كأنه ربنا بيفرحك  ويكافئك مرتين فنشكر ربنا 200 مليون مرة
• أن تكونى مخطوبة وانتى اللى جايبة الجاتوه يبقى احلى حاجة لما تلاقى بواقى
• أن تكون خاطباً أو مخطوبةً...تلك هى الفرحة  

ولىَ عودة إن شاء الرحمن

رسالة ربانية

من يومين وانا بتراودنى فكرة اننا ساعات كتير بندعى ربنا

عشان حاجة معينة ونفضل ندعى وندعى وندعى

ومفيش حاجة تحصل فنبطل دعاء

طب ليه بعد ما ندعى كتير اوى

ومحصلش حاجة نبطل ندعى

ليه ممكن نزهق من الدعاء أحيانا

ونمل كدة ونبطل دعاء فى الاخر

وبعد ما خلاص فقدنا الامل خالص 

ان الحاجة دى تحصل نقول لنفسنا وانا ادعى ليه

مادام ربنا مش رايدلى الحاجة دى

ونبدأ نشك فى نفسنا اننا مانستحقش الحاجة دى

او ان ربنا مش رايدلنا الحاجة دى عشان ذنوبنا كتير

واننا وحشين ومنستحقش كرم ربنا

ووارد جدا كمان اننا بعد ما ندعى كتيييير اوى

ربنا يحققلنا اللى احنا عوزينه بس بعد ما نكون يئسنا

فليه ندعى مادام ربنا ساعات يأخرلنا أمنياتنا

وليه نتعب نفسنا فى الدعاء مادام ربنا اللى عاوزه حيكون

احنا ماندعيش اصلا ونستنى اللى ربنا يديهولنا

.

مين فينا مفكرش فى الافكار الشيطانية السوداوية المأساوية دى

الانسان فى الحالة دى يبقى إيمانه فى أقل درجاته

والمفروض يودوه لاقرب عناية ايمانية مركزة

طب ايه العلاج ؟

العلاج فى الكبسولة دى..لا إله إلا انت سبحانك انى كنت من الظالمين

زمان..فى زمن الانبياء..وتحديدا فى زمن نبى الله يونس عليه السلام

اقولكم؟

تيجو نقراها من القرآن أحسن

وَذَا النُّونِ إِذ ذَّهَبَ مُغَاضِبًا فَظَنَّ أَن لَّن نَّقْدِرَ عَلَيْهِ فَنَادَىٰ فِي الظُّلُمَاتِ أَن لَّا إِلَـٰهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ ﴿٨٧﴾ فَاسْتَجَبْنَا لَهُ وَنَجَّيْنَاهُ مِنَ الْغَمِّ ۚ وَكَذَٰلِكَ نُنجِي الْمُؤْمِنِينَ ﴿٨٨﴾ سورة الأنبياء

لما قريت تفسيرها الميسر
،،،

واذكر قصة صاحب الحوت، وهو يونس بن مَتَّى عليه السلام، أرسله الله إلى قومه فدعاهم فلم يؤمنوا، فتوعَّدهم بالعذاب فلم ينيبوا، ولم يصبر عليهم كما أمره الله، وخرج مِن بينهم غاضبًا عليهم، ضائقًا صدره بعصيانهم، وظن أن الله لن يضيِّق عليه ويؤاخذه بهذه المخالفة، فابتلاه الله بشدة الضيق والحبس، والتقمه الحوت في البحر، فنادى ربه في ظلمات الليل والبحر وبطن الحوت تائبًا معترفًا بظلمه؛ لتركه الصبر على قومه، قائلا: لا إله إلا أنت سبحانك، إني كنت من الظالمين. (٨٧)

،،،

يا نهار أبيض 
واخد بالك؟
لم يصبر كما أمره ربه

طب احنا مش حياكلنا حوت ولا حاجة..بس انت متخيل ممكن يحصلنا ايه من الافكار اللى فكرنا فيها دى

حيبلعنا الهم والحزن والنكد والقنوط واليأس والاكتئاب

حيبلعنا سوء الظن والكفر بقدر الله والعياذ بالله

حيبلعنا جهلنا وظلمنا

حتبلعنا حاجات كتيييرة ممكن تودينا فى طريق سد

ونبقى احنا اللى جبناه لنفسنا لاننا حتى لو افترضنا اننا بطلنا دعاء..لكننا ما أحسناش الظن بربنا وماصبرناش

وحسن الظن دة..زى العصا السحرية..زى ما حتظن فى ربنا..ربنا حيظن فيك

لو ظنيت فى ربنا ان ربنا بيكرهلك الخير...غلط.. لان ربنا مش مكره لينا الخير زى رسولنا قال

لو ظنيت فى ربنا انه مش حيغفرلك..غلط.. لان ربنا بيغفر كل الذنووووب بالاستغفار والتوبة وكل حاااجة ماعدا الشرك بالله

لو ظنيت انه مش حيرزقك ..غلط..وربنا يبسط الرزق لمن يشاء ويقدر وهو عنده خزائن كل شئ..ومفاتيح الرزق كلها..بيرزق الكافر..مش حيرزق المسلم الموحد حتى لو جه بذنوب اد الجبال

لو ظنيت انه بيعذبك..غلط..هو بينقيك عشان تبقى زى الدهب غالى..ربنا مش بيعذب المؤمن لكن  بيبتليه , التعذيب دة للكافر..وانت مسلم موحد
ولو مصبرتش..متقولش مش قادر اصبر
انما الصبر بالتصبر
يعنى اعمل نفسك صابر
اقعد قول لنفسك انا صابر انا صابر انا صابر
حتقتنع انك صابر
وقلبك حيصدقك والله
طب صابر بس مش راضى
زيها بالظبط
من رضى فله الرضا
ومن سخط فله السخط
اقعد قول لنفسك انا حرضى 
انا حرضى
حتلاقى نفسك صدقتك

،،، 
كل اللى قلته دة انا جربته حرف حرف
واحساس احساس
بيقولو اسأل مجرب ولا تسال طبيب
وادى المجرب جه لغاية عندك
ومن غير فيزيتا :D
.
يعنى فيه أمل أعيش يا دكتور؟
طبعا :))
واخد بالك من كلمة "فاستجبنا له" ؟
يعنى العلاج مضمون
.

ختـــــــام

.

أصعب حاجة انك ماتكونش عارف انك مريض
والاصعب انك ماتلاقيش حد يداويك
والاشد صعوبة انك ترفض تتعالج
فتعيش طول عمرك مريض
والعلاج ادامك

.
طب ازاى وربنا جعلنا القرآن 
شفاء لقلوبنا
وهدى لحيرتنا
ورحمة لألمنا

.
اخر حاجة بقى عشان تاخد الدوا
اخر مرة ختمت فيها القرآن
كانت امتى؟

.

لا إله إلا أنت سبحانكـ,إنى كنت من الظالمين

.

بالشفا ان شاء الله

:)

حتة : يؤجل الله أحلامنا ولا ينساها